तीळ-खोबऱ्याच्या खुसखुशीत सारोट्या

संक्रांतीला किंवा संक्रांतीच्या आसपासच्या दिवसांत आपण तीळगूळाचे लाडू, वड्या, पोळ्या घरोघरी बनवल्या जातात. विदर्भात या पदार्थांच्या बरोबरीने साटोऱ्या देखील बनवतात. यामध्ये फक्त तीळ-गूळ नाही, तर शेंगदाणे व सुकं खोबरंदेखील वापरलं जातं. त्यामुळे या सारोट्या अतिशय खमंग आणि खुशखुशीत होतात. तोडांत टाकताच लगेच त्या विरघळतात. तुम्हीही करून बघा, नक्की आवडतील...

साहित्य : एक वाटी तीळ, अर्धी वाटी शेंगदाणे, अर्धी वाटी सुक्या खोबऱ्याचा कीस, एक वाटी गूळ, एक वाटी बारीक रवा, एक छोटा चमचा वेलची पूड आणि साजूक तूप.

कृती : सर्वप्रथम रव्यात एक टेबलस्पून तुपाचं कडकडीत मोहन घालून तो पाण्याने मळून घ्यावा आणि बाजूला ठेवावा. नंतर तीळ मंद आचेवर खमंग भाजून घ्यावेत. शेंगदाणे व खोबऱ्याचा कीसदेखील भाजून घ्यावा. तीळ आणि शेंगदाण्याचा कूट एकत्र बारीक करून घ्यावा. मग गूळ बारीक करावा / किसून घ्यावा. हे झाल्यावर तीळ व शेंगदाण्याचा कूट, खोबऱ्याचा कीस आणि गूळ एकत्र करावा व सगळं मिश्रण मिक्सरमध्ये एकत्र बारीक करून घ्यावं. बारीक केल्यावर या तयार मिश्रणात वेलची पूड घालावी. ही तयारी झाल्यावर भिजवलेल्या रव्याचे लिंबा एवढे गोळे करावे. प्रत्येक गोळ्याची पारी करून त्यात एक टेबलस्पून तीळ-खोबऱ्याचं मिश्रण घालून साटोऱ्या हलक्या हाताने साटोऱ्या लाटून घ्याव्यात व साजूक तुप टाकून तव्यावर छान खरपूस भाजून घ्याव्यात. या साटोऱ्या चवीला अतिशय मस्त लागतात.
- नीलिमा खडतकर, मीरा रोड