पावसाळ्यातील धुंद वातावरण... वाफाळणारा चहा आणि सोबतीला कुरकुरीत 'भजी' हे दर पावसाळ्यात पठडीतले वर्णन करतच खवय्ये भज्यांवर ताव मारतात. यामध्ये तेलकट आणि तिखट या प्रकारांकडे काणाडोळा करूनच जिभेचे चोचले पुरवणारे, अस्सल खवय्ये असतात. मॉलचे शहर असणाऱ्या ठाणे शहरात पिझ्झा, बर्गर आणि फ्रँकीच्या भाऊगर्दीत आजही उत्तमोत्तम भजी मिळणारे स्पॉट्स त्यांची मक्तेदारी राखून आहेत. ठाण्यातील अशाच खमंग भजी स्पॉट्सची सफर...
- सदिच्छा वडापाव, टेंभी नाका : ठाण्यातील टेंभीनाक्यावरील एका बैठ्या घराच्या खिडकीतून विकले जाणारे वडा आणि मूगडाळ भजी प्रसिद्ध आहे. मूगडाळ भजीसाठी मुगाची डाळ चार ते पाच तास पाण्यात भिजविण्यात येते. त्यानंतर मिक्सरमध्ये डाळ वाटून त्यामध्ये हिंग, हळद, कडीपत्ता, कोथिंबीर, मिरची, आले, काळी मिरी पावडर, रवा आदी पदार्थ एकत्र करण्यात येतात. एकत्रित केलेले हे मिश्रण बेसनात भिजवून भजी तळण्यात येते. लाल आणि हिरव्या रंगाच्या चटणीसह भजीचा आस्वाद घेता येतो. दुपारी चार ते रात्री आठ या मर्यादित वेळेत खवय्यांना याठिकाणी भजीसह वडे उपलब्ध असतात.
- श्रद्धा स्नॅक्स, घंटाळी रोड : अनेक वर्षांपासून ठाण्यातील अबालवृद्धांच्या तोंडी मूगडाळ भजी आणि वड्यासह सामोशांसाठी श्रद्धा स्नॅक्स कॉर्नर सुप्रसिद्ध आहे. सायंकाळी प्रचंड गर्दी असणाऱ्या या कॉर्नरवरील मूगडाळ भजी चविष्ट आणि कुरकुरीत असते.
- ए. के. जोशी शाळेसमोर : ३० वर्षांपासून ठाण्यातील नौपाडा भागात असणाऱ्या ए. के. जोशी शाळेसमोर जोशी मावशींची वडापावची लहानशी गाडी आहे. त्याठिकाणी घरगुती पद्धतीने तयार करण्यात येणारी पालक भजी, बटाटा भजी, मूगडाळ भजी, कांदा भजी अशा विविध प्रकारच्या भजी मिळतात. इतरत्र मिळणाऱ्या बटाटा भजीपेक्षा येथील बटाटा भजी काहीशी जास्त खमंग आणि रुचकर असते. तसेच चविष्ट वडे ही जोशी मावशींच्या लहानशा कॉर्नरची खासियत आहे. दुपारी चार ते रात्री आठ या वेळेतच खवय्यांना वडे-भजीचा आस्वाद घेता येतो.
- उपवन भजी स्टॉल, उपवन तलाव : दोन वर्षांपूर्वी आलेल्या टाइमपास चित्रपटात चित्रित करण्यात आलेल्या ठाण्यातील उपवन तलावाजवळील पायलादेवी मंदिरासमोर असणाऱ्या वडा-भजी कॉर्नरवर उत्तम कुरकुरीत भजी मिळतात. पावसात भिजण्याचा आस्वाद लुटल्यानंतर खवय्यांची पावले आपसूकच येथील भजी कॉर्नरकडे वळतात.
याव्यतिरिक्त नौपाडा भागातील गजानन वडापाव सेंटरमध्ये बटाटा, कांदा आणि पालक भजी, राजमाता कॉर्नरमध्ये पालक भजी, येऊर येथील येऊर स्नॅक्स सेंटरमध्ये मिळणारी मूगडाळ भजी, किसननगर येथील किशोर मसुरकर यांचे गजानन वडा पाव सेंटरमधील भजी तसेच आनंदनगर येथील श्री कृष्णा स्वीट्स येथील कांदाभजी, सामोसा प्रसिद्ध आहे.
मोबाइल अॅप डाउनलोड करा आणि राहा अपडेट