रमजान पर्वात मुस्लिम बांधवांचे काही खास पदार्थ तयार होत असतात. ते पदार्थ फक्त रमजान पर्वातच उपलब्ध होतात. रमजान महिन्यात इफ्तार पार्टीसाठी या पदार्थांची मेजवानी असते. त्यामुळे मिठाई, सुकामेवा तसेच खमंग पदार्थांची अनेक दुकाने भद्रकाली परिसरात थाटली आहेत. शिरखुर्मा, सुतरफेणी, मालपोवा, शाही तुकडा, तुर्री आणि कबाब या पदार्थांना जास्त मागणी आहे. जवळपास या सर्वच पदार्थांमध्ये शेवया वापरल्या जातात. परंतु त्यांच्या चवीमध्ये मात्र फरक आहे.
स्पेशल मालपोवा
स्पेशल मलई मालपोवा हा पदार्थ जास्त आवडीने खाल्ला जातो. यामध्ये मैदा घेऊन त्यात साखर घालत तुपामध्ये एकत्रित केले जाते. गोडी अधिक वाढावी म्हणून मलई बर्फीदेखील यामध्ये टाकली जाते. त्यानंतर या सर्व मिश्रणात उकळलेली अंडी घालून स्पेशल मालपोवा तयार केला जातो. अंड्याच्या ऑम्लेटप्रमाणे हा मालपोवा असतो. अंड्याच्या स्वादासोबतच मलई बर्फी असल्याने मलईयुक्त अंड्याची चव याला प्राप्त होते. दूध बाजारातील 'इक्बाल हॉटेल'मधील मालपोव्याला जास्त मागणी आहे.
सुतरफेणी
सुतरफेणी तयार करताना तांदळाचा तयार भात घेऊन त्यात गोड दूध घातले जाते. तयार दूधात व्हॅनीला किंवा मँगो क्रश घातला जातो. नंतर यामध्ये खारिक, पिस्ता बदाम यांचे तुकडे घालून सुतरफेणी सर्व्ह केली जाते. दूध बाजारातील 'मुंबई स्वीट्स' येथील सुतरफेणी नाशकात फेमस आहे.
शाही तुकडा
हा खास पदार्थ रमजानमध्येच तयार होतो. मूळचा इराणचा असलेला हा पदार्थ बनवताना विशिष्ठ प्रकारचा ब्रेड यासाठी वापरला जातो. हा ब्रेड मैदा किंवा गव्हाचा असतो. शाही तुकडा तयार करताना शेवाया दुधात भिजवून त्याचा लगदा तयार केला जाते आणि त्यानंतर या शेवाया त्या ब्रेडवर ठेवून त्यावरती मलई (काही ठिकाणी बासुंदी) तसेच बदाम, पिस्त्याचा क्रश भुरभुरून हा शाही तुकडा सर्व्ह केला जातो. भद्रकाली परिसरातील सर्वच मिठाईच्या दुकानात या शाही तुकड्याला मागणी आहे.
तुर्री
तुर्री हा पदार्थ नाही तर एक खास असा मसाला आहे. खारिक, बदाम, खजूर, पिस्ता सर्वच सुकामेवा वापरत त्यांची पूड तयार केली जाते. हा तयार मसाला गरम दुधात साखर मिसळून घालता जातो. त्यावर पुन्हा सुकामेवा घालून दूध सर्व्ह होते. खास मसाला दुधासाठी तयार होण्याऱ्या या मसाल्याला 'तुर्री' म्हटले जाते. रमजान पर्वात थाटलेल्या सर्वच सुकामेव्याच्या दुकानात हा मसाला उपलब्ध आहे.
शिरखुर्मा
रमजान ईदला शिरखुर्म्याचे अनन्यसाधारण महत्त्व आहे. शिरखुर्मा बनताना दूध उकळून त्यात साखर घातली जाते. दुधात नंतर उकळलेल्या शेवाया व भात घालून त्यावर तूप तसेच चवीसाठी खजूर, बदाम पिस्ता याची पुडही घालती जाते. काहीवेळा खाण्याचा रंगही वापरला जातो.
कबाब
रमजान पर्वात सर्वच गोड पदार्थांना महत्त्व असले तरी चिकन कबाबही तेवढेच आवडीने खाल्ले जातात. बोनलेस चिकनमध्ये बटाट्याचा क्रश घातला जातो. यात तिखट, मिरची, खास कोकणी मसाले घालून या तयार मिश्रणाचे त्रिकोणी, गोल अशा विविध आकारांचे
कबाब तयार केले जातात. ते कबाब तळून घेतले जातात. काही ठिकाणी कबाब बारिक शेव किंवा खसखस लावून ते परतले जातात. खमंग, कुरकुरीत तिखट अशा कबाबना जोरदार मागणी असते. नाशकातील 'गरिब नवाज' चे कबाब फेमस आहेत.
मोबाइल अॅप डाउनलोड करा आणि राहा अपडेट
