नाचणीचा पौष्टिक शिरा
खरपूस भाजलेली नाचणी, साजूक तूप वापरून केलेला नाचणीचा शिरा म्हणजे एक पौष्टिक पदार्थ.
साहित्य - एक वाटी अख्खी नाचणी, पाऊण वाटी साखर (किंवा गूळ), एक वाटी दूध, २ वाट्या पाणी, वेलची पावडर, गरजेनुसार साजूक तूप, सुकामेवा, चिमूटभर मीठ.
कृती - प्रथम मंद आचेवर नाचणी भाजून घ्यावी. नंतर मिक्सरवर त्याचं रवाळ पीठ करावं. हे पीठ परत एकदा तुपावर खमंग भाजून घ्यावं. त्यानंतर यात आवश्यकतेनुसार गरम पाणी आणि गरम दूध घालावं. तयार मिश्रण व्यवस्थित ढवळून त्यावर झाकण ठेवून एक वाफ काढावी. वाफ काढल्यानंतर यात साखर मिसळून (तुम्हाला जर साखरेला पर्याय हवा असेल तर तुम्ही गुळाचा देखील वापर करू शकता.) साखर किंवा गूळ घातला, की परत एक वाफ काढावी. या मिश्रणात शिऱ्याची चव वाढवण्यासाठी तुम्ही थोडं मीठसुद्धा घालू शकता. यानंतर वरून सुकामेव्याचे तुकडे घातले, की चविष्ट, पौष्टिक नाचणीचा शिरा नैवेद्यासाठी तयार!
गुलकंद मॅजिक लाडू
गुलकंदाबरोबरच इतर पौष्टिक जिन्नसांचं मिश्रण केल्यामुळे हे लाडू नैवेद्याचा एक चविष्ट पर्याय ठरू शकतात. हे रंगीबेरंगी लाडू पाहिल्यानंतर प्रत्येकाच्या तोंडाला पाणी सुटेल यात शंकाच नाही.
साहित्य - एक वाटी जाडे पोहे, अर्धी वाटी गुलकंद, पाव वाटी बिनबियांचा काळा खजूर, सुकामेव्याची पूड, अख्खे काजू-बदाम (सजावटीसाठी), भाजलेल्या खसखसीची पावडर
कृती - मंद गॅसवर पोहे व्यवस्थित खरपूस भाजून घेऊन मिक्सरवर त्यांचं बारीक पीठ करून घ्यावं. यानंतर त्यात गुलकंद, काळा खजूर, सुकामेव्याची पावडर हे जिन्नस मिसळावेत. तयार मिश्रणाचे लाडू वळावेत. हे लाडू खरपूस भाजलेल्या खसखसीच्या पावडरमध्ये छान घोळवून घ्यावेत. सजावटीसाठी वरून काजू-बदामाचे तुकडे लावल्यानंतर नैवेद्यासाठी लाडू तयार.
मोबाइल अॅप डाउनलोड करा आणि राहा अपडेट