पौष्टिक पपई लाडू

सध्या थंडीचे दिवस चालू आहेत. या दिवसांत शरीराला उष्णतेची गरज असते. सध्या बाजारात मुबलक प्रमाणात उपलब्ध असलेली पपई, उष्ण असते आणि म्हणूनच मी या मोसमात नेहमी पपईचे पौष्टिक लाडू बनवते. पपईचा नैसर्गिक रंग असल्यामुळे या लाडवांत रंग घालायची गरज नसते. काही पपई गोड असतात, काही कमी गोड असतात; त्यामुळे गोडाचं प्रमाण आवडीनुसार घ्यावं. या थंडीत हे लाडू जरूर करून बघा-

साहित्य : १ कप पपईचा पल्प, १ कप डेसिकेटेड कोकोनट, १ मोठा चमचा चिरलेला गूळ, २ मोठे चमचे मिल्क पावडर, १/२ चमचा वेलची पूड, सजावटीसाठी बदाम-पिस्ता काप

कृती : पॅनमध्ये पपईचा पल्प घालून मध्यम आचेवर शिजवा. नंतर त्यात गूळ घाला. गूळ घातल्यावर मिश्रण पातळ होईल. मिश्रण थोडं घट्ट होत आलं की डेसिकेटेड कोकोनट घाला. मग पूर्ण पाणी सुकेपर्यंत पल्प शिजवा. मिश्रण सतत ढवळत राहा. नाहीतर मिश्रण तळाला लागण्याची शक्यता असते. मिश्रण घट्ट झालं की गॅस बंद करा. मिश्रण थोडं कोमट असतानाच, त्यात मिल्क पावडर, वेलची पूड (आवडत असल्यास घाला, कारण पपईची नैसर्गिक चव असणारच आहे) घालून एकजीव करा. फ्रीजमध्ये अर्धा तास ठेवा. नंतर काढून मिश्रणाचे लाडू वळा आणि डेसिकेटेड कोकोनट मध्ये घोळवा. वरून पिस्ता-बदाम काप लावून सजवा (सजावटीसाठी चांदीचा वर्खही लावू शकता). मस्त पौष्टिक असे हे पपईचे लाडू लहान मुलांना खाऊ घाला आणि मोठ्यांनीही खा.

- दीपा गड