साहित्यः चार ते पाच पिकलेले रायवळ आंबे, एक चमचा मैदा किंवा तांदुळाचं पीठ, दोन ओल्या मिरच्या, दोन सुक्या मिरच्या, एक चमचा मोहरी, चार ते पाच कढीलिंबाची पानं, लिंबाएवढा गूळ किंवा दोन मोठे चमचे साखर, मीठ, हिंग, फोडणीसाठी तेल, पाणी
कृतीः प्रथम आंब्याची सालं आणि बाठी काढून वेगवेगळ्या पातेल्यात घ्यावी. सालं पाणी घालून चांगली पिळून काढावी. साधारणतः एक ते दीड ग्लास पाण्याचा वापर करावा. ते पाणी सोललेल्या बाठींमध्ये घालावं. त्यात दोन हिरव्या मिरच्या उभ्या चिरुन घालाव्या. लिंबाएवढा गूळ किंवा आवश्यक तेवढी साखर आणि चवीवीपुरतं मीठ घालावं. आता हे मिश्रण एकजीव करून गॅसवर शिजवावं. मिश्रण पारदर्शक दिसू लागलं की, बाठी शिजल्याचं समजावं. गॅस बारीक करावा. मैदा किंवा तांदळाच्या पिठात पाणी घालून ते गॅसवरच्या मिश्रणात घालावं. मग दोन चमचे तेल, मोहरी, सुकी मिरची, कढीपत्ता, हिंग यांची फोडणी करुन ती या मिश्रणावर घालावी. अशी होईल तयार, आंब्याची उपकरी.
कैरीचं सुकं लोणचं
साहित्यः कैरीचे ५-६बारीक तुकडे, ७ते८ ब्याडगी मिरच्या, २ चमचे धने, ५-६ मेथी दाणे, ५-६ मिरी, १ चमचा हिंग, १ चमचा हळद, खडे मीठ, एक लहान चमचा तेल, अर्धा चमचा मोहरी, अर्धा चमचा तांदुळ
कृतीः प्रथम एका कढईत थोडंसं तेल घ्यावं. त्यात सुक्या मिरच्या, धने, मेथी दाणे, मिरे घालून चांगलं भाजावं. मग त्यात हिंग, हळद आणि खडे मीठ घालावं. मीठ तडकेपर्यंत पुन्हा भाजून घ्यावं. आता त्यात मोहरी आणि तांदूळ परतून घ्यावे. भाजलेलं मिश्रण थोडं थंड झाल्यावर मिक्सरमधून त्याची पावडर करुन घ्यावी. चिरलेल्या कैरीच्या तुकड्यांमध्ये ही पावडर चांगली मिक्स करावी. या लोणच्याला तेलाची फोडणी नसल्याने कोणीही ते खाऊ शकते. फ्रीजमध्ये ठेवल्यास कितीही दिवस चांगलं राहतं. लोणचं करण्यासाठी झाडावरुन पडलेल्या कै‍ऱ्यासुद्धा चालतात.
अडगई
(कच्च्या फणसाचं लोणचं)
साहित्यः ७ ते ८ कच्च्या फणसाच्या फोडी, एका मध्यम कैरीच्या फोडी, दोन चमचे धने, ७ते८ ब्याडगी मिरच्या, ५-६ मेथी दाणे, ७-८ मिरी, एक चमचा हिंग, एक चमचा हळद, चवीनुसार खडे मीठ, अर्धा चमचा मोहरी, अर्धा चमचा तांदुळ, एक चमचा तेल, २ ग्लास पाणी.
कृतीः फणसाचे आणि कैरीचे तुकडे एकत्र करुन ते साधारणतः दोन ग्लास पाण्यात शिजवायला ठेवावे. ते चांगलं शिजल्यावर थंड करायला ठेवावं. त्यातील जास्तीचं पाणी काढून टाकावं. कढईत एक छोटा चमचा तेल घालून, मिरच्या, धने, मेथी, मिरी भाजायला घ्यावं. ते चांगलं भाजून झाल्यावर त्यात हिंग, हळद, मोहरी, तांदुळ घालून भाजून घ्यावं. नंतर खडा मीठ घालून तडतडेपर्यंत परतावं. या मसाल्याची बारीक पावडर करुन घ्यावी. ही पावडर थंड झालेल्या फणस, कैरीत घालावी. लोणच्याला हवा तेवढा खार किंवा खोळ करावा. खोळ कमी वाटल्यास बाजूला ठेवलेलं पाणी घालून त्याचा खोळ वाढवावा. तयार झालेली 'अडगई' फ्रीजमध्ये ब‍ऱ्यापैकी टिकते.
मोबाइल अॅप डाउनलोड करा आणि राहा अपडेट